2 Maccabees Chapter 21 - መጽሐፈ መቃብያን ካልእ | EOTC Bible

¹የራሳቸው ገንዘብና የእጃቸው ሥራ ያልሆነውን የሌላውን ገንዘብ በዐመፅ የሚሰበስቡ ሰዎች ወዴት አሉ? ²ያለ ዋጋ የሌላውን ገንዘብ ይወስዳሉና፥ የምትደርስባቸው ዕለተ ሞታቸውንም ሳያውቁ ይሰበስባሉና፥ ገንዘባቸውንም ለባዕድ ይተዋሉና። ³ልጆቻቸውም በአባቶቻቸው ገንዘብ ደስ አይላቸውም፤ እንደ አባቶቻቸው እንደ እነርሱ ያሉ ኃጥኣንን በስርቆትም ቢሆን በቅሚያም ቢሆን፥ አስጨንቀው የሚይዙ የኃጥኣን ወገኖች ናቸውና። ⁴የአባቶቻቸውም ገንዘብ አይጠቅማቸውም፤ በንጥቂያና በግፍ ሰብስበውላቸዋልና፤ እንደ ጉም ሽንትና ነፋስ እንደሚበትነው ጢስም፥ እንደሚረግፍ ሣርም፥ በእሳትም ፊት እንደሚቀልጥ ሰም እንዲሁ የኃጥኣን ክብራቸው ይጠፋል። ⁵ዳዊትም እንደ ተናገረ፥ “ኀጢአተኛን እንደ ሊባኖስ ዛፍ ለምልሞና ከፍ ከፍ ብሎ አየሁት፤ በተመለስሁ ጊዜ ግን አጣሁት፤ ፈለግሁ፤ ቦታውንም አላገኘሁም።” ⁶የማይሞቱ መስሏቸው የሌላውን ገንዘብ በግፍ ስለሚሰበስቡ ዛሬ ባልንጀሮቻቸውን የሚበድሉ ሰዎች እንዳይመኩ የኃጥኣን ጥፋታቸው እንደዚህ በአንድ ጊዜ ነው። ⁷እናንተ ሰነፎች፥ እንደምታልፉ፥ ገንዘባችሁም ከእናንተ ጋር እንደሚያልፍ አስቡ፤ ወርቃችሁና ብራችሁ ቢበዛ የዛገ ይሆናል። ⁸ልጆችን ብታበዙም የመቃብር ብዛት ይሆናል፤ ቤቶችንም ብታበዙ የፈረሰ ይሆናል። ⁹የአምላካችሁ የእግዚአብሔርን ፈቃድ አልፈጸማችሁምና ከብት ብታበዙም ለጠላቶቻችሁ ምርኮ ይሆናል፤ ያልተባረከ ሆኗልና፥ እጃችሁን ያኖራችሁበት ገንዘብ ሁሉ አይገኝም። ¹⁰በቤትም ያለ ቢሆን፥ በዱርም ያለ ቢሆን፥ በመሰማሪያና በእርሻም ያለ ቢሆን፥ በእህል አውድማና በወይን መጭመቂያም ያለ ቢሆን አይገኝም። ¹¹በሆዳችሁም ፍሬ ቢሆን ደስ አይላችሁም፤ ነገር ግን ከጠላቶቻችሁ የተነሣ ኀዘን ይሆንባችኋል። የእግዚአብሔርን ትእዛዝ ስላልጠበቃችሁ፥ እግዚአብሔር ከቤተ ሰባችሁ ሁሉ ጋር አያድናችሁምና። ¹²ሕጉንና ሥርዐቱን፥ ትእዛዙንም የጠበቁ ሰዎችን ግን ከበረከቱ አያሳጣቸውም፤ የለመኑትንም ሁሉ ይሰጣቸዋል፤ የምድራቸውን ፍሬና የሆዳቸውን ፍሬም ይባርክላቸዋል። ¹³እንዲገዙ እንጂ እንዳይገዙ፥ በዙሪያቸው ከአሉ አሕዛብም ሁሉ በላይ ያደርጋቸዋል፤ በመሰምሪያቸውም ቦታ በረከቱን ሁሉ ይሰጣቸዋል። ¹⁴እጃቸውን ያኖሩበትን ሁሉ፥ የእርሻቸውን ፍሬ ሁሉና የከብቶቻቸውን ቦታ ሁሉ ይባርክላቸዋል፤ በሆዳቸውም ፍሬ ደስ ያሰኛቸዋል። ¹⁵ከብቶቻቸውንም አያሳንስባቸውም፤ ከመከራቸውም ሁሉ ከበሽታና ከድካምም፥ ከጥፋትም፥ ከሚያውቁትና ከማያውቁትም ያድናቸዋል። ¹⁶በፍርድም ጊዜ ይከራከርላቸዋል፤ ከክፉ ነገርና ከመከራም፥ ከሚቃወማቸውም ሁሉ ያድናቸዋል፤ በመጀመሪያ የድንኳኑን ሥራ በአደራ የተቀበለ ሌዋዊ የድንኳኑን ሥራ ቢጠብቅ፥ በእግዚአብሔርም ፈቃድ ቢሄድ፥ በመጀመሪያው ሕግ እንደ ሕጉ ሁሉ ዐሥራቱንና ከሰው ጀምሮ እስከ ከብት ድረስ በኵራቱን ይሰጡት ነበር። ¹⁷ሙሴም የነዌ ልጅ ኢያሱን እንዳዘዘው በሚፈርዱበትና ለሚፈርዱለት ፍርድን እስኪሰጡ ድረስ ባለማወቅ ወይም በማወቅ ነፍስ የገደለ ሰው ቢኖር በዚያ ይድን ዘንድ በከተሞቻቸው ሁሉ መማጸኛ ከተማ ነበር። ¹⁸“ቀድሞ ከእርሱ ጋር ጠብ እንዳለው በልቡናችሁ መርምሩ አላቸው፤ ¹⁹ምሳርም ቢሆን፥ ድንጋይም ቢሆን፥ እንጨትም ቢሆን፥ ባለማወቅ ከእጄ ስለ ወደቀ ያ የወደቀበት ሰው ሞተብኝ ቢል፥ መርምራችሁ አድኑት፤ ባለማወቅ አድርጎታልና ይድናል። ²⁰በማወቅ ቢያደርገው ግን እንደ በደሉ ፍዳውን ይቀበላል፤ የሚምረውም የለም፤ ባለማወቅ ቢያደርግና ቢገድለው ግን ባለማወቅ አድርጎታልና እንዳይሞት መርምራችሁ አድኑት።” ²¹ሙሴም የእግዚአብሔርን ትእዛዝ እንዳይተላለፉ ለእስራኤል ልጆች እንደዚህ ሥርዐት ሠርቶላቸው ነበር፤ ከክፋትም ሁሉ እንዲርቁ ሥርዐት ሠርቶላቸው ነበር። ²²በፍርዱና በሕጉ ይኖሩ ዘንድ፥ ጣዖት ከማማለክ፥ ሙቶ ያደረውንና አባላ የተመታውን ከመብላትም፥ በእግዚአብሔር ትእዛዝ ለሚኖሩና እንደ ሠራላቸው ከክፉ ሥራ ሁሉ ለሚርቁ ለሰው ልጆች ከማይገባው ሁሉ ፈጽመው ይርቁ ዘንድ አዘዛቸው። ²³ነፍሳቸውንም ያድኑ ዘንድ፥ በጎ ከሠሩ ከአባቶቻቸው ጋራ ማደሪያቸውን ያገኙ ዘንድ በሰማይ ባለች ድንኳን አምሳል ከሠራላቸው ትእዛዝ እንዳይወጡ አዘዛቸው። ²⁴በእግዚአብሔር ቃል ያመኑና በትእዛዙ የሄዱም እነርሱ የጻድቃን ልጆች ይባላሉ። የእግዚአብሔርን ፈቃድ ከአደረጉ ከአዳምና ከሴት ናቸውና። ²⁵የአዳም ልጆች ነንና፥ በጎ ሥራንና እግዚአብሔርን ደስ የሚያሰኘውንም ሁሉ እንሠራ ዘንድ በመልኩና በምሳሌው ፈጥሮናልና አይንቀንም። ²⁶በጎ ሥራን ብንሠራም በጎ ሥራን ከሠሩ ጋራ መንግሥተ ሰማያትን እንወርሳታለን፤ የሚወዱትን አይለያይምና። ²⁷በንጹሕ የሚለምኑትን ሰዎች እጅግ ይወዳቸዋል፤ ጸሎታቸውንም ይሰማቸዋል፤ ቈርጠው ንስሓ የሚገቡትንም ንስሓቸውን ይቀበላቸዋል፤ ሕጉንና ሥርዐቱን፥ ትእዛዙንም ለሚጠብቁ ሰዎች ኀይልንና ጽናትን ይሰጣቸዋል። ²⁸ፈቃዱንም ያደረጉ ሰዎች ለዘለዓለሙ በመንግሥቱ ከእርሱ ጋር ደስ ይላቸዋል፥ ፊተኞችም ቢሆኑ፥ ኋለኞችም ቢሆኑ ምስጋናን ያቀርቡለታል። ከዛሬ ጀምሮ እስከ ዘለዓለም አሜን።

መጽሐፈ መቃብያን ካልእ 21