1 Maccabees Chapter 36 - መጽሐፈ መቃብያን ቀዳማዊ | EOTC Bible

¹የመቄዶን ሰዎች፥ አትመኩ፤ አማሌቃውያንም፥ አንገታችሁን አታስግጉ፤ የሚበቀላችሁ እግዚአብሔር አለና። ²እስከ ሰማይ ከፍ ከፍ ብትሉ እስከ ሲኦል ትወርዳላችሁና። ³እስራኤል ቀድሞ በሞዓብና በሜዶን መንግሥት ወደ ግብፅ ሀገር በገቡ ጊዜ “ትገዳደሩት ዘንድ በእግዚአብሔር መገዳደር አይገባምና አትመኩ” አለ። ⁴“አንተም ይስማኤላዊ የባርያ ልጅ! ያንተ ወዳልሆነው አንገትህን ለምን ታስረዝማለህ? በምድርስ ይፈረድባት ዘንድ በተነሣ ጊዜ በፍርድ ቀን እግዚአብሔር እንደሚፈርድብህ አታስብምን? ⁵የዚያን ጊዜም እንደ እጅህ ሥራ ትቀበላለህ፤ ልቡናህንስ ለምን ከፍ ከፍ ታደርጋለህ? አንገትህንስ ለምን ታስረዝማለህ? ይላል ሁሉን የሚገዛ እግዚአብሔር። ⁶ወገኖችህ ያልሆኑትን አንተ እንደ ተገዳደርህ እኔም አንተን እገዳደርሃለሁ፤ ክፉ ትሠራ ዘንድ የወደድኸውን ታደርጋለህና በላክሁህም ቦታ ቸል እልሃለሁ። ⁷እኔም በአንተ ላይ እንዲሁ አደርጋለሁ ይላል ሁሉን የሚችል እግዚአብሔር። አንተም በጎ ብታደርግ፥ እኔ የምወደውንም ብትወድድ የለመንኸኝን ሁሉ እሰማሃለሁ። ⁸ፈቃዴንም ብታደርግ ፈቃድህን አደርጋለሁ፤ ጠላቶችህንም እቃወምልሃለሁ፤ ሥራህን፥ ዘርህንና ልጆችህንም እባርክልሃለሁ። ⁹የላሞችህንና የበጎችህን መንጋ እባርክልሃለሁ፤ በትእዛዜም ብትሄድ፥ እኔም የምወደውን ብታደርግ እጅህን ያኖርህበትን ሁሉ እባርካለሁ ይላል ሁሉን የሚችል እግዚአብሔር። ¹⁰“ፈቃዴን ባታደርግ፥ በትእዛዜና በሕጌ ባትሔድ ግን ቀድሞ የተነገረው ይህ ሁሉ መከራ ያገኝሃል፤ በትእዛዜ አልታገሥህምና በሕጌም አልሔድህምና ሁልጊዜ ከምትመጣብህ ቍጣዬ ማምለጥ አትችልም። ¹¹እኔ የወደድሁትንም አልወደድህምና፤ እኔም ካለመኖር ወደ መኖር አምጥቼ የፈጠርሁህ ሲሆን እኔን ከማመስገንና ከማምለክ ቸል ብለሃል። ¹²የወደድኸውን ሁሉ ታደርግ ዘንድ በበታችህ በአሉት ዘንድ ክብርንና ጌትነትን ሰጠሁህ። ትገድልና ታድን ዘንድ፥ ትሠራና ታፈርስም ዘንድ፥ ታከብርና ታዋርድም ዘንድ፥ ከፍና ዝቅም ታደርግ ዘንድ የአንተ ነበር። ¹³የእግዚአብሔርንም ፈቃድ ብታደርግ፥ በትእዛዙም ብትሔድ፥ በጌትነቱ ከእርሱ ጋራ ደስ ይልህ ዘንድ ቅድስት ሀገርንም ከወረሱ ሰዎች ጋር ተካፋይ ትሆን ዘንድ ይወድድሃል። ¹⁴እርሱ እንዲህ ብሏልና፦ ቢታገሡኝ ክብርንና መወደድን አወርሳቸዋለሁ፥ በቤተ መቅደሴም ደስ አሰኛቸዋለሁ፤ እንደ ቍርባን መሥዋዕትም የተመረጡና የተወደዱ ይሆናሉ ይላል ሁሉን የሚችል እግዚአብሔር።” ¹⁵ከሞት ወደ ሕይወት ትሻገሩ ዘንድ መልካም ማድረግንና የድኅነት መንገድን ቸል አትበሉ። ¹⁶በጎ ሥራ የሚሠሩትን ግን እግዚአብሔር ከክፉ ሁሉ እንደ ጠበቀው እንደ ኢዮብ ባሮቹ ይሆኑ ዘንድ እግዚአብሔር በበጎው ሁሉ ይጠብቃቸዋል። ¹⁷ነገሥታቱን በገደላቸው ጊዜ እንደ አዳነው እንደ አብርሃም፥ ጣዖት ያስመልኩት ዘንድ በማታና በጧት በቀንና በሌሊት ሰውነቱን ሲያውኳት ከነበሩ፥ አብርሃም ከኖረባቸው ከከናኔዎን እጅና ከፈርዖን እጅ እንዳዳነው እንደ ሙሴም፤ ¹⁸እርሱ ግን የእነርሱ ወደ ሆኑ ጣዖታቱ ሲስቡት እንቢ እያለ ይታገሥ ነበረ። ¹⁹እርሱም እንቢ ይላቸው ነበረ፤ የፈጠረው እግዚአብሔርንም ያመልከው ነበረ። ከልጅነቱ ጀምሮ እርሱን ያመነው አብርሃም ለእግዚአብሔር የታመነ ወዳጁ ነበረና። ²⁰እግዚአብሔርን ፈጽሞ ይወደው ነበርና እስኪሞት ድረስ እግዚአብሔርን ማምለክን አላጓደለም፤ እስከሚሞትበትም ቀን ድረስ ከትእዛዙ አልተላለፈም፤ የእግዚአብሔርንም ትእዛዝ ይጠብቁ ዘንድ ለልጆቹ አስተማረ። ²¹እነርሱም አባታቸው አብርሃም እንደ አደረገ ከአግዚአብሔር ትእዛዝ አልተላለፉም፤ “በምድር አብርሃም የሚባል ወዳጅ አለኝ” ብሎ ለመላእክት እንደ ነገራቸው እግዚአብሔር ስለ እነርሱ የተናገረላቸው ባሮቹ የአብርሃም ልጆች ይስሐቅና ያዕቆብ ከእግዚአብሔር ሕግ አልተላለፉም። ²²“አብርሃም ወዳጄ ነው፤ ይስሐቅም ባለሟሌ ነው፤ ያዕቆብም ልቡናዬ የወደደችው ነው፤ በእነርሱም ዘንድ ተመሰገንሁ ይላል ሁሉን የሚችል እግዚአብሔር፤” ²³የእስራኤልንም ልጆች ፈጽሞ ሲወድዳቸው እነርሱ ግን ዘወትር ሲያሳዝኑት ኖሩ፤ እርሱም ሲታገሣቸው፥ በምድረ በዳም መና ሲመግባቸው ኖረ። ²⁴ልብሶቻቸውም አላረጁም፤ የዕውቀት እንጀራ መናንም ተመግበዋልና እግሮቻቸው አልነቁም። ²⁵ልቡናቸው ግን ሁል ጊዜ ከእግዚአብሔር ይርቅ ነበር፤ ከጥንትም ጀምሮ ክፋትን የሚሠሩ ነበሩና ለመዳን ተስፋ አልነበራቸውም። ²⁶እንደ ጠማማ ቀስትም ሆኑ እንጂ በአማረ አኗኗራቸው እግዚአብሔርን እንዳገለገሉት እንደ አባቶቻቸው እንደ አብርሃምና እንደ ይስሐቅ፥ እንደ ያዕቆብም አልሆኑም፤ በጣዖታቸው በተራራውና በኰረብታው ላይ ሁልጊዜ ያሳዝኑት ነበር፤ በተራራው ላይ፥ በዋሻውና በዛፎቹም ሥር ይበሉ ነበር። ²⁷ፍሪዳ ያርዱ ነበር፤ መሥዋዕትም ይሠዉ ነበር፤ በእጃቸውም ሥራ ደስ ይላቸው ነበር፤ ተረፈ መሥዋዕቱንም ይበሉ ነበር፤ የመጠጡንም ቍርባን ፍላቂ ይጠጡ ነበር፤ ከአጋንንትም ጋራ ይዘፍኑና ይጫወቱ ነበር። ²⁸አጋንንትም ጨዋታቸውንና ዘፈናቸውን ሁሉ፥ ስካራቸውንም ሁሉ ያደንቁላቸው ነበር፤ ያለልክም ዝሙትን ይሠሩ ነበር፤ እግዚአብሔር የማይወደው ቅሚያንና ስስትንም ያደርጉ ነበር። ²⁹ለከነዓን ጣዖት ለበዓልና ለምድያም ጣዖት፥ ለኤሎፍሊ ጣዖታት ለዳጎንና ለአጵሎን፥ ለአርጤማዴስና ለሰራጵዮን፥ ³⁰በዙሪያቸውም ላሉ ለአሕዛብም ጣዖታት ሁሉ መሥዋዕት ይሠዉ ነበር። አሕዛብም እንደሚያደርጉት በአዩትና በሰሙት ሁሉን ያመልኩ ነበር፤ አሕዛብም የሚያደርጉትን ጨዋታቸውንና ዘፈናቸውን፥ ድንፋታቸውንም ያደርጉ ነበር። ³¹እግዚአብሔርን እናመልከዋለን የሚሉ የእስራኤል ሕዝብ እንደዚሁ ያደርጉ ነበር። የእግዚአብሔርን ትእዛዛት ይጠብቁ ዘንድ፥ ጣዖትንም ከማምለክ ይርቁ ዘንድ፥ ³²የሁዳዱን እህል ከመገባቸው፥ ወደ ምድሩም አዝመራ ካወጣቸው፥ ከማጓም ማሩን ከአጠገባቸው፥ መናውንም ከመገባቸው፥ ካባቶቻቸው ፈጣሪ በቀር ሌሎች አማልክትን እንዳያመልኩ ሙሴ በኦሪት የነገራቸውን ትእዛዙንና ሕጉን ግን አያደርጉም ነበር። ³³የተመኙትንና የፈለጉትን አይነሳቸውም ነበር፤ እርሱም አምላካቸው ነውና የወደዱትን ይመግባቸው ነበር። ³⁴እነርሱ ግን እግዚአብሔርን ማሳዘን አልተዉም፤ ደስ ባሰኛቸው ጊዜ እግዚአብሔርን ይዘነጉት ነበር። ³⁵መቅሠፍትንም ባመጣባቸው ጊዜ ወደ እርሱ ይጮሁ ነበር፤ ካገኛቸውም መከራ ያድናቸው ነበር፤ ዳግመኛም በግልጥ ደስ ይላቸው ነበር፤ ብዙ ዘመንም ይኖሩ ነበር። ³⁶ወዲያውም እንደ ቀድሞው እግዚአብሔርን ያሳዝኑት ዘንድ ፈጽመው ልባቸውን ይመልሱ ነበር፤ ያጠፏቸውም ዘንድ በዙሪያቸው ያሉ አሕዛብን ያስነሣባቸው ነበር፤ አስጨንቀውም ያስገብሩአቸው ነበር። ³⁷ዳግመኛም ተመልሰው ወደ ፈጣሪያቸው ወደ እግዚአብሔር ፈጥነው ይጮሁ ነበር። ³⁸እርሱም ይቅር ይላቸው ነበር፤ በአማረ አኗኗራቸው ከጥንት ጀምሮ እግዚአብሔርን ስለ አገለገሉትና መሐላውን ስለ አጸናላቸው ስለ አባቶቻቸው ስለ ኖኅ፥ ስለ አብርሃምና ስለ ይስሐቅ፥ ስለ ያዕቆብም ነው እንጂ ስለ ራሳቸው አይደለም። ³⁹እንደ ሰማይ ከዋክብትና እንደ ባሕር አሸዋ ዘራቸውን ያበዛ ዘንድ የወደዱትንና ትእዛዙን የጠበቁትን ወደዳቸው። ⁴⁰እንደ ባሕር አሸዋ ያላቸው በሙታን ትንሣኤ ጊዜ ከእስራኤል ልጆች ተለይተው ወደ ገሃነም የሚገቡ የኃጥኣን ነፍሳት ናቸው። ⁴¹በሰማይ ላይ እንደሚያበሩ ከዋክብት ናቸው የተባሉት ግን ከእስራኤል ልጆች ወገን የጻድቃን ነፍሳት ናቸው። እግዚአብሔር አብርሃምን እንዲህ ብሎታልና፥ “ሌሊት ወደ ሰማይ እይ፤ መቍጠርም ትችል እንደ ሆነ የሰማይን ከዋክብት ቍጠራቸው፤ እንደዚሁም ልጆችህ ጻድቃን እንደ ሰማይ ከዋክብት በመንግሥተ ሰማይ ያበራሉ። ⁴²“ዳግመኛም ወደ ባሕሩና ወደ ወንዙ ዳርቻ ተመልከት፤ በአሸዋው ውስጥ ያለውንም እይ፤ መቍጠርም ትችል እንደ ሆነ ቍጠር፤ በሙታን ትንሣኤ ጊዜ ወደ ገሃነም የሚወርዱ ልጆችህ እንደዚሁ ናቸው፤” ⁴³አብርሃምም በእግዚአብሔር አመነ፤ ስለዚህም ጽድቅ ሆኖ ተቈጠረለት፤ በምድርም ተስፋው ደረሰለት፤ ሚስቱ ሳራም ከአረጀች በኋላ ወንድ ልጅ ይስሐቅን አገኘች። ⁴⁴ዳግመኛም ስለ እምነቱ በሰማያት መንግሥትን ያገኛል። ሙታን እንደሚነሡ፤ በጎ ሥራን የሠሩም ወደ ዘለዓለም ሕይወት፥ ⁴⁵ክፉ የሠሩም በሙታን ትንሣኤ ጊዜ ወደ ዘለዓለም ቅጣት እንደሚሔዱ አምኖአልና። በጎ ሥራ የሠሩ ጻድቃን ግን ከእርሱ ጋር ለዘለዓለም ይነግሣሉ። ⁴⁶ክፉ የሠሩም ለዘለዓለም ይፈረድባቸዋል አሜን፥ አሜን።

መጽሐፈ መቃብያን ቀዳማዊ 36