1 Maccabees Chapter 1 - መጽሐፈ መቃብያን ቀዳማዊ | EOTC Bible

¹ስሙ ጺሩጻይዳን የሚባል፥ ክፋትንም የሚወዳት አንድ ሰው ነበር፤ በፈረሶቹ ብዛትና ከሥልጣኑ በታች ባሉ በጭፍራዎቹ ጽናት ይመካ ነበር። ²የሚያመልካቸውና የሚሰግድላቸው፥ በመዓልትና በሌሊት መሥዋዕት የሚሠዋላቸው ብዙ ጣዖታት ነበሩት። ³እርሱ ግን በልቡናው ድንቍርና እነርሱ ኀይልንና ብርታትን የሚሰጡት ይመስለው ነበር። ⁴በልቡም በግዛቱ ሁሉ እነርሱ ሥልጣንን የሚሰጡት ይመስለው ነበር። ⁵ዳግመኛም በሰልፍ ጊዜ እነርሱ ሥልጣንንና የተመኘውንም ሁሉ የሚሰጡት ይመስለው ነበር። ⁶እርሱም ቀንና ሌሊት ይሠዋላቸው ነበር። ⁷ጣዖታቱን የሚያገለግሉ ካህናትን ሾመ። ⁸ከዚያች ከረከሰች መሥዋዕት እነርሱ እየበሉ ቀንና ሌሊት ጣዖቶቹ የሚበሉ አስመስለው ይነግሩት ነበር። ⁹ዳግመኛ መሥዋዕት ሠውተው ይበሉ ዘንድ ሌሎች ሰዎችን እንደ እነርሱ ያተጉ ነበረ። ዳግመኛም እነርሱ መሥዋዕት ሠውተው እንደ እነርሱ መሥዋዕት ይሠዉ ዘንድ ሌሎች ሰዎችን ያተጉ ነበር። ¹⁰እርሱ ግን ጥቅም በሌለው ጣዖቱ ይታመን ነበር። ¹¹በልቡ ድንቍርናና በዕውቀቱ ማነስ እነርሱ የፈጠሩት፥ እነርሱም የሚመግቡትና የሚያነግሡት ይመስለው ነበር፤ አማልክት ሳይሆኑ አማልክት ካላቸው ከእርሱ ጋራ ተፈርዶባቸው ለዘለዓለም ወደ ገሃነመ እሳት ይሄዱ ዘንድ ካለ መኖር ወደ መኖር አምጥቶ የፈጠረውን ፈጣሪውን እርሱ ከወገኖቹ ጋር እንዳያውቅ ሰይጣን ልቡናውን አደንቁሮታልና የፈጠሩት ይመስለው ነበር። ¹²መቼም መች ሕያዋን አይደሉምና ሙታን ይሏቸው ዘንድ ይገባል። ¹³የሚያስታቸው የሰይጣን መንፈስ በዚያ በጣዖቱ ምስል ያድራልና፥ የልቡናቸውንም ፈቃድ ይነግራቸዋልና፥ እንደ ወደዱም ይገለጥላቸዋልና ባመኑባቸው፥ ልቡናቸውም እንደ ዐመድ የሆነ የአዳም ልጆች በሚታመኑባቸው በጣዖቶቹ ይፈረድባቸዋል። ¹⁴ያሰቡትንም እንደ ፈጸመላቸው በአዩ ጊዜ ያደንቃሉ፤ እነርሱም ከባሕርያቸው የተወለዱ ወንዶች ልጆቻቸውንና ሴቶች ልጆቻቸውን እስኪሠዉ፥ የወንዶች ልጆቻቸውንና የሴቶች ልጆቻቸውን ንጹሕ ደም እስኪያፈስሱ ድረስ ፈቃዱን ያደርጋሉ። ¹⁵እስከ ዘለዓለም ድረስ መውጫ ወደሌለባት፥ እርሱ መከራ ወደሚቀበልባት እንደ እርሱ ወደ ገሃነም ያወርዳቸው ዘንድ ሰይጣን ክፉ ፈቃዳቸውን ለመፈጸም መሥዋዕቱን አጣጥሞላቸዋልና አላሳዘኗቸውም። ¹⁶ያ ጺሩጻይዳን ግን ትዕቢተኛ ነበር፤ በወንዶች አምሳል የተሠሩ ሃምሳ፥ በሴቶች አምሳል የተሠሩም ሃያ ጣዖቶች ነበሩት። ¹⁷ጥቅም በሌላቸው በእነዚያ በጣዖታቱም ይመካ ነበር፤ እጅግም ያከብራቸው ነበር፤ ጧትና ማታም ይሠዋላቸው ነበር። ¹⁸ሰዎችንም ለጣዖቱ መሥዋዕት ይሠዉ ዘንድ ያዛቸው ነበር፤ እርሱም ከዚያች የረከሰች መሥዋዕት ይበላ ነበር፤ ሌሎችንም ከመሥዋዕቱ ይበሉ ዘንድ ያዝዛቸው ነበር፤ ይልቁንም ለክፋት ይተናኰል ነበር። ¹⁹የብረትና የናስ፥ የእርሳስም ለሆኑ፥ ተመትተውም ለተሠሩ ጣዖታቱ አምስት ቤት ሠራላቸው። ²⁰በወርቅና በብርም አስጌጣቸው፤ በቤቱም ዙሪያ መጋረጃ አስጋረደላቸው፤ ድንኳንም አስተከለላቸው። ²¹በዚያም ጠባቂዎችን ሾመላቸው፤ የሰቡ ዐሥር በሬዎችን፥ ዐሥር መሲናዎች ላሞችን፥ የሰቡ ዐሥር የበግ ሙክቶችን፥ የመሰኑ ዐሥር ፍየሎችንም ክንፍ ከአላቸው ከወፎች ጋራ ለጣዖታቱ ዘወትር አርባ ይሠዋላቸው ነበር። ²²ለእርሱ ግን ጣዖታቱ የሚበሉ ይመስለው ነበር፤ ሃምሳ ፊቀን ወይን፥ በዘይት የታሸ ሃምሳ ወጪት ስንዴንም ያቀርብላቸው ነበር። ²³ካህናቱንም “ወስዳችሁ ስጧቸው፤ ፈጣሪዎች ያረድሁላቸውን ሥጋ ይብሉ፤ ያቀረብሁላቸውንም ወይን ይጠጡ፤ ባይበቃቸውም እኔ እጨምርላቸዋለሁ” አላቸው። ²⁴ከዚያች ከረከሰች መሥዋዕትም ይበሉና ይጠጡ ዘንድ ሁሉን ያስገድድ ነበር። ²⁵እርሱ ግን በክፉ ተንኰሉ የማይሠዋም፥ የማይሰግድም እንዳለ ለይተው ዐውቀው ያመጡት ዘንድ፥ በፊቱም በእሳትና በሰይፍ ይቀጡት ዘንድ ገንዘቡንም ይበረብሩት ዘንድ፥ ቤቱንም በእሳት ያቃጥሉት ዘንድ፥ ያለውንም ገንዘቡን ሁሉ ይወስዱበት ዘንድ በግዛቱ ሁሉ የሚሰልሉ ጭፍራዎቹን ላከ። ²⁶ለአማልክቶችም መሠዋትንና ማምለክን እንቢ ካለ ለእርሱ እኔ መከራንና ቅጣትን አሳየዋለሁ። እነርሱ ደጋጎችና ታላላቆች ናቸውና፥ በቸርነታቸውም እኛን ፈጥረዋልና፤ ²⁷ሰማይንና ምድርን፥ ታላቅ ባሕርንም፥ ፀሐይንና ጨረቃን፥ ከዋክብትንም፥ ነፋሳትንና ዝናማትንም፥ ለእኛም ምግብና ጥጋብ ሊሆነን የሚንቀሳቀሰውን ሁሉ ፈጥረዋልና። ²⁸የማያመልኳቸው ግን በፍጹም መከራ ይቀጣሉ፤ አይራሩላቸውምም።

መጽሐፈ መቃብያን ቀዳማዊ 1