Teref Baruch Chapter 3 - ተረፈ ባሮክ | EOTC Bible

¹አቤሜሌክም ኤርምያስ ከላከው ቦታ በቀትር ጊዜ በለሱን አመጣ፤ ጽፍቅ ያለች ዱርንም አገኘ፤ ጥቂትም ያርፍ ዘንድ በጥላዋ ስር ተቀመጠ፤ በለስ ያለባትንም ሙዳይ ተንተርሶ ስድሳ ስድስት ዓመት ተኛ፤ ከመኝታውም አልነቃም። ²ከዚያም ዘመን በኋላ ከመኝታው ነቅቶ ተነሣ፤ “ገና ራሴን ይከብደኛልና፥ እንቅልፌንም አልጨረስሁምና ዳግመኛ ጥቂት ልተኛ” አለ። ³ያንም የበለሱን ሙዳይ ከፈተ፤ በለሶችም አዲስ ሆነው፥ ወተታቸውም ሲፈስስ አገኘ፤ ራሱንም ከብዶት ነበርና እንቅልፉንም አልጨረሰምና ይተኛ ዘንድ ወደደ። ⁴እንዲህም አለ፥ “ተመልሼ እንዳልተኛ እንዳልዘገይም እፈራለሁ፤ አባቴ ኤርምያስ ተግቶ በጧት ልኮኛልና እንዳይቈጣኝ እፈራለሁ። ⁵ሙቀት ሆኗልና፥ በሁሉም የሚተውበት ጊዜ የለምና አሁን ተነሥቼ እሄዳለሁ።” ⁶ተነሥቶም የበለሱን ሙዳይ ይዞ ወደ ኢየሩሳሌም ከተማ ገባ። ከተማውንም ቤቱንም አላወቀም። ⁷ጽኑ ድንጋጤ መጥቶበታልና “አቤቱ፥ አንተ የተመሰገንህ ነህ” አለ። ⁸እንዲህም አለ፥ “ይህቺ ከተማ ኢየሩሳሌም አይደለችምን? በተራራው ጎዳና መጥቻለሁና፥ ራሴንም ከብዶኛልና፥ እንቅልፌንም አልጨረስሁምና አእምሮዬን ዘንግቼ ምናልባት ተስቶኝ ይሆን? ⁹ከተማዪቱ ባዕድ እንደ ሆነችብኝ በኤርምያስ ዘንድ ይህን ነገር እንዴት እናገራለሁ?” ኢየሩሳሌምም እንደ ሆነች በከተማው ያለውን ምልክት ሁሉ ፈለገ። ¹⁰ዳግመኛም ወደ ከተማ ተመለሰ፤ የሚያውቀውም እንዳለ ፈለገ፤ ነገር ግን አላገኘም፤ “ታላቅ ድንጋጤ በእኔ መጥቶብኛልና አቤቱ፥ አንተ የተመሰገንህ ነህ” አለ። ¹¹ሁለተኛም ከከተማ ርቆ ወጣ፤ እያዘነም ተቀመጠ፤ ሲሄድም አያውቅም ነበር፤ የበለሱንም ሙዳይ አኖረ፤ “ይህን ድንቁርና እግዚአብሔር ከእኔ እስኪያርቅልኝ ድረስ በዚህ እቀመጣለሁ” አለ። ¹²ከዚህ በኋላ ተቀምጦ ሳለ አንድ ሽማግሌ ሰው ከምድረ በዳ ሲመለስ አየ። ¹³አቤሜሌክም እንዲህ አለ፥ “አንተ ሽማግሌ፥ ይቺ ከተማ ማን ናት? ብዬ እጠይቅሃለሁ።” ¹⁴ያም ሽማግሌ፥ “ኢየሩሳሌም ናት” አለው፤ “ያገኘሁት ሰው የለምና የእግዚአብሔር ካህን ኤርምያስ ወዴት አለ? ሌዋዊው ባሮክና የከተማው ሕዝብ ሁሉስ ወዴት አሉ?” አለው፤ ¹⁵ሽማግሌውም እንዲህ አለው፥ “አንተ ከዚች ከተማ አይደለህምን? ይህን ያህል ዘመን ኖረህ የእርሱን ነገር ትጠይቅ ዘንድ ኤርምያስን ዛሬ ማን ዐሰበው? ¹⁶ተማርኮ በባቢሎን ንጉሥ በናቡከደነፆር እጅ ተሰጥቶአልና፤ እስራኤልንም ያስተምር ዘንድ ወደ ባቢሎን ሄዶአልና ኤርምያስስ ከሕዝቡ ጋር በባቢሎን አለ።” ¹⁷አቤሜሌክም ያንጊዜ ከዚያ ከሽማግሌው ይህን ቃል ሰማ። ¹⁸አቤሜሌክም እንዲህ አለው፥ “ሰውን፥ ይልቁንም ሽማግሌውን ሰው ሊንቁት አይገባም እንጂ አንተ ሽማግሌ ሰው ባትሆን በሰደብሁህ ነበር፤ በአንተም በዘበትሁብህ ነበር፤ ያም ባይሆን አእምሮውን ያጣ ሽማግሌ ብዬ በሰደብሁህ ነበር። ¹⁹ሕዝቡ ተማርከው ወደ ባቢሎን ሄዱ፤ ስለምትለውስ ነገር የሰማይ ሻሻቴ እንኳ በእነርሱ ላይ ቢወርድ ወደ ባቢሎን ተማርከው ይሄዱ ዘንድ ጊዜው አይደለም። ²⁰አንተ ግን ተማርከው ወደ ባቢሎን ሄዱ ትላለህ፤ በሕዝቡ ዘንድ ላሉ ለበሽተኞች እንሰጥ ዘንድ አባቴ ኤርምያስ እኔን እንደ ላከኝ ጥቂት በለስ ላመጣ ወደ አግሪጳስ ወይን ቦታ ሄድሁ። ²¹ሄጄም ከዚያ ደረስሁ፤ ያዘዘኝንም ይዤ ተመለስሁ፤ ስሄድም አንዲት ዛፍ አገኘሁ፤ የቀትር ጊዜ ነበርና በበታችዋ ዐርፍ ዘንድ ተቀመጥሁ። ²²ከዚያም የበለሱን ሙዳይ ተንተርሼ ተኛሁ፤ ከእንቅልፌም በነቃሁ ጊዜ የዘገየሁ መሰለኝ፤ የበለሱንም ሙዳይ ከፍቼ አየሁ፤ መርጬ እንደለቀምኋቸው ወተቱ ሲፈስስ አገኘሁት። ²³እነሆ፥ አንተ ሕዝቡ ተማርከው ወደ ባቢሎን ሄዱ ትላለህ፤ እነሆ፥ በለሱ እንዳልጠወለገ እይ” ብሎ የበለሱን ሙዳይ ከፍቶ አሳየው። ²⁴ሽማግሌውም በለሱ አዲስ እንደ ሆነ፥ ወተቱም እንደሚፈስስ አየ፤ ያንጊዜም ሽማግሌው አደነቀ። ²⁵አቤሜሌክንም እንዲህ አለው፥ “ልጄ፥ አንተ ደግ ሰው ነህ፤ ፈጣሪህ የዚህችን ከተማ ጥፋት ሊያሳይህ አልወደደምና አምላክ ለአንተ መረጋጋትን አምጥቶ አድኖሃል። ²⁶እነሆ፥ ሕዝቡ ወደ ባቢሎን ተማርከው ከሄዱ ዛሬ ስድሳ ስድስት ዓመት ሆነ። ²⁷ልጄ፥ ፈጽመህ ልታውቅስ ከወደድህ ዘሮችዋ እንደ በቀሉ ወደ እርሻዎች ፈጽመህ ተመልከት፤ የበለስም ጊዜው አይደለም፤” ያንጊዜ አቤሜሌክ የዚህ ሁሉ ጊዜው እንዳልሆነ ዐወቀ። ²⁸ቃሉንም አሰምቶ፥ “የሰማይና የምድር አምላክ፥ በሀገሩ ሁሉ ያሉ የጻድቃን ነፍሳት ዕረፍታቸው የሆንህ ጌታዬና አምላኬ ሆይ፥ አመሰግንሃለሁ፥” አለ። ²⁹ሽማግሌውንም፥ “ይህ ወር ምንድን ነው?” አለው፤ እርሱም፦ የኔሳን ወር ዐሥራ ሁለተኛው ቀን፥ ይኸውም ሚያዝያ ነው” አለው። ³⁰ከዚህም በኋላ አቤሜሌክ ለዚህ ሽማግሌ ከበለሶቹ ሰጠው፤ እርሱም፥ “አምላክ ወደ ሰማያዊት ሀገር ወደ ኢየሩሳሌም ይምራህ” አለው።

ተረፈ ባሮክ 3