ትንቢተ ዳንኤል 3

ናቡከደነፆር ያቆመው የወርቅ ምስል

¹ንጉሡ ናቡከደነፆር በነገሠ በዐሥራ ስምንተኛው ዓመት ቁመቱ ስድሳ ክንድ፥ ወርዱም ስድስት ክንድ የሆነ የወርቅ ምስል አሠራ፤ በባቢሎንም አውራጃ በዱራ ሜዳ አቆመው። ²ንጉሡም ናቡከደነፆር መኳንንትንና ሹሞችን፥ አዛዦችንና አዛውንቶችን፥ በጅሮንዶችንና አማካሪዎችን፥ መጋቢዎችንም፥ አውራጃ ገዢዎችንም ሁሉ ይሰበስቡ ዘንድ፥ ንጉሡ ናቡከደነፆርም ላቆመው ምስል ምረቃ ይመጡ ዘንድ ላከ። ³በዚያን ጊዜም መኳንንቱና ሹሞቹ፥ አዛዦቹና አዛውንቶቹ፥ በጅሮንዶቹና አማካሪዎቹ፥ መጋቢዎቹና አውራጃ ገዢዎቹ ሁሉ ንጉሡ ናቡከደነፆር ላቆመው ምስል ምረቃ ተሰበሰቡ፤ ናቡከደነፆርም ባቆመው ምስል ፊት ቆሙ። ⁴አዋጅ ነጋሪውም እየጮኸ እንዲህ አለ፥ “ሕዝብና አሕዛብ፥ በልዩ ልዩ ቋንቋም የምትናገሩ ሆይ! ንጉሥ ይላችኋል፥ ⁵የመለከትንና የእንቢልታን፥ የመሰንቆንና የክራርን፥ የበገናንና የዋሽንትን፥ የዘፈንንም ሁሉ ድምፅ በሰማችሁ ጊዜ ወድቃችሁ ንጉሡ ናቡከደነፆር ላቆመው ለወርቁ ምስል ስገዱ፤ ⁶ወድቆም የማይሰግድ በዚያን ጊዜ በሚነድድ እሳት እቶን ውስጥ ይጣላል።” ⁷ስለዚህ በዚያን ጊዜ አሕዛብ ሁሉ የመለከቱንና የእንቢልታውን፥ የመሰንቆውንና የክራሩን፥ የበገናውንና የዘፈኑንም ሁሉ ድምፅ በሰሙ ጊዜ፥ ወገኖችና አሕዛብ፥ በልዩ ልዩ ቋንቋም የሚናገሩ ሁሉ ወድቀው፤ ንጉሡ ናቡከደነፆር ላቆመው ለወርቅ ምስል ሰገዱ።

ሠለስቱ ደቂቅ

⁸በዚያን ጊዜ ከለዳውያን ቀርበው አይሁድን በንጉሡ በናቡከደነፆር ዘንድ ከሰሱ። ⁹እንዲህም አሉት፦“ንጉሥ ሆይ፥ ለዘለዓለም ኑር! ¹⁰ንጉሥ ሆይ! የመለከትንና የእንቢልታን፥ የመሰንቆንና የክራርን፥ የበገናንና የዋሽንትን፥ የዘፈንንም ሁሉ ድምፅ የሚሰማ ሰው ሁሉ ወድቆ ለወርቁ ምስል ይስገድ፥ ¹¹ወድቆም የማይሰግድ በሚነድድ እሳት እቶን ውስጥ ይጣላል ብለህ በቃልህ አዘህ ነበር። ¹²አሁንም ንጉሥ በባቢሎን ሀገሮች ለሚሠራ ሥራ የሾምኻቸው፥ ከአይሁድ ወገን የሚሆኑ ትእዛዝህን እምቢ ያሉ፥ አምላክህን ያላመለኩ፥ ለሠራኸውም ለወርቁ ምስል ያልሰገዱ ሚሳቅና ሲድራቅ፥ አብደናጎም የሚባሉ ሦስት ሰዎች አሉ።” ¹³ያንጊዜም ናቡከደነፆር ተቈጣ፤ በቍጣም ሲድራቅንና ሚሳቅን፥ አብደናጎንም ያመጡ ዘንድ አዘዘ፤ እነዚህንም ሰዎች ወደ ንጉሡ ፊት አመጡአቸው። ¹⁴ናቡከደነፆርም፥ “ሲድራቅና ሚሳቅ አብደናጎም ሆይ፥ አምላኬን አለማምለካችሁ፥ ላቆምሁትም ለወርቁ ምስል አለመስገዳችሁ እውነት ነውን? ¹⁵አሁንም የመለከቱንና የእንቢልታውን፥ የመሰንቆውንና የክራሩን፥ የበገናውንና የዋሽንቱን የዘፈኑንም ሁሉ ድምፅ በሰማችሁ ጊዜ ወድቃችሁ ላሠራሁት ምስል ብትሰግዱ መልካም ነው፤ ባትሰግዱ ግን በዚያ ጊዜ በሚነድድ እሳት እቶን ውስጥ ትጣላላችሁ፤ ከእጄስ የሚያድናችሁ አምላክ ማን ነው?” ብሎ ተናገራቸው። ¹⁶ሲድራቅና ሚሳቅ፥ አብደናጎም መለሱ፤ ንጉሡንም፥ “ናቡከደነፆር ሆይ! በዚህ ነገር እንመልስልህ ዘንድ አንፈልግም። ¹⁷ንጉሥ ሆይ! እኛ የምናመልከው አምላክ በሰማይ አለ፥ ከሚነድደው ከእሳቱ እቶን ያድነን ዘንድ ይችላል፤ ከእጅህም ያድነናል፤ ¹⁸ንጉሥ ሆይ! ይህም ባይሆን፥ አማልክትህን እንዳናመልክ፥ ላቆምኸውም ለወርቁ ምስል እንዳንሰግድለት ዕወቅ” አሉት። ¹⁹የዚያን ጊዜም ናቡከደነፆር በሲድራቅና በሚሳቅ፥ በአብደናጎም ላይ ቍጣ ሞላበት፤ የፊቱም መልክ ተለወጠባቸው፤ እርሱም ተናገረ፤ የእቶንም እሳት ይነድድ ከነበረው ይልቅ ሰባት እጥፍ አድርገው እንዲያነድዱት አዘዘ። ²⁰ሲድራቅንና ሚሳቅን፥ አብደናጎንም አስረው፥ ወደሚነድድ ወደ እቶን እሳት ይጥሉአቸው ዘንድ ኃያላን ሰዎችን አዘዘ። ²¹የዚያን ጊዜም እነዚያ ሰዎች ከሰናፊላቸውና ከጫማቸው፥ ከቀሚሳቸውና ከመጎናጸፊያቸውም፥ ከቀረውም ልብሳቸው ጋር አስረው በሚነድድ በእቶን እሳት ውስጥ ጣሉአቸው። ²²የንጉሡም ትእዛዝ እጅግ ስለ በረታ፥ የእቶኑም እሳት እጅግ ስለሚነድድ፥ ሲድራቅንና ሚሳቅን፥ አብደናጎንም የጣሉአቸውን ሰዎች የእሳቱ ወላፈን ገደላቸው። ²³እነዚህም ሦስቱ ሰዎች ሲድራቅና ሚሳቅ፥ አብደናጎም ታስረው በሚነድደው በእቶኑ እሳት መካከል ወደቁ።

ጸሎተ ሠለስቱ ደቂቅ

²⁴በእሳት መካከልም ተመላለሱ እግዚአብሔርንም ፈጽመው አመሰገኑት። ²⁵አዛርያም ቁሞ እንዲህ ብሎ ጸለየ፥ በእሳቱም መካከል ምስጋናን ጀመረ፦ ²⁶“የአባቶቻችን አምላክ እግዚአብሔር ይክበር፤ ²⁷ባመጣህብን ነገር ሁሉ አንተ ጻድቅ ነህና፤ ሥራህ ሁሉ የታመነ ነው፤ ሥርዐትህም ሁሉ የቀና ነው፤ ²⁸ባደረግህብን ነገር ሁሉ ፍትሕ ርትዕ አደረግህ፤ ²⁹የተውንህ እኛ በድለናል፤ ስተናልና ³⁰መልካም ይሆንልን ዘንድ፥ ³¹ያመጣህብንንና ያደረግህብንን ሁሉ በእውነተኛ ፍርድህ አደረግህብን። ³²ከአንተ ፈጽመው በራቁ ኀጢአተኞችና ወንጀለኞች በሚሆኑ በጠላቶቻችን እጅ ጣልኸን፤ ³³አሁንም አፋችንን እንከፍት ዘንድ አገባባችን አይደለም ³⁴ስለ ስምህ ብለህ ፈጽመህ አሳልፈህ አትስጠን። ³⁵ይቅርታህንም አታርቅብን። ³⁶ዘራቸውን እንደ ሰማይ ኮከብ፥ ³⁷ስለ ኀጢአታችን በሀገሩ ሁሉ ዛሬ የተዋረድን ሆን። ³⁸በዚህ ወራት አለቃ የለም፤ ነቢይም የለም፤ ንጉሥም የለም፤ ³⁹በየዋህ ልቡና በቀና መንፈስ ተቀበልልን እንጂ፤ ⁴⁰እንደ ጊደሮችና ላሞች፥ ⁴¹አሁንም በፍጹም ልቡናችን እንከተልሃለን፤ እንፈራሃለንም፤ ⁴²አታሳፍረን፤ ነገር ግን እንደ ቸርነትህና እንደ ይቅርታህ ብዛት አድርግልን፥ ⁴³በተአምራትህም አድነን፤ ⁴⁴አገልጋዮችህን ስቃይ ያሳዩአቸው ሁሉ ይፈሩ፤ በቅሚአቸውም ሁሉ ይፈሩ፤ ኀይላቸውም ይድከም፤ ⁴⁵አንተ እግዚአብሔር ብቻህ አምላክ፥ ⁴⁶እነዚያም ብላቴናዎች በንጉሥ ዘንድ ነገር ሠርተው ማጣላታቸውን አልተዉም፤ በእሳቱም ድኝ አደሮማር፥ ቁልቋል፥ ቅንጭብ ጨመሩ። ⁴⁷ነበልባሉም ከጕድጓዱ አርባ ዘጠኝ ክንድ ከፍ ከፍ አለ። ⁴⁸እሳቱም እየተመላለሰ በከለዳውያን ምድጃ ጕድጓድ አጠገብ ያገኘውን ሁሉ ያቃጥል ነበር። ⁴⁹የእግዚአብሔርም መልአክ ከአናንያና ከአዛርያ ከሚሳኤልም ጋር ወደሚነደው ወደ እሳቱ ምድጃ ወርዶ ከምድጃ ያለውን እሳት መታው፤ ⁵⁰የእሳቱንም ነበልባል እንደ ቀዝቃዛ ነፋስ አደረገው፤ እነዚያንም ሰዎች እሳቱ ምንም አልነካቸውም፤ የራሳቸውንም ጠጕር አልለበለባቸውም፤ አላስጨነቃቸውምም። ⁵¹ያንጊዜም እነዚያ ሦስቱ ሰዎች ሁሉ በአንድ አፍ ፈጽመው አመሰገኑ፤ በእሳቱ ጕድጓድ ውስጥም እግዚአብሔርን አመሰገኑት፤ እንዲህም አሉ፦ ⁵²የአባቶቻችን አምላክ እግዚአብሔር ይክበር ይመስገን፤ ⁵³የጌትነቱ ቅዱስ ስምም ይክበር ይመስገን፤ ⁵⁴በምትመሰገንበት ቅዱስ ቦታ አንተ የከበርህ ነህ፤ ⁵⁵በኪሩቤል ላይ ሆነህ ጥልቆችን የምታይ አንተ የከበርህ ነህ፤ ⁵⁶በጌትነትህም ዙፋን አንተ የከበርህ ነህ፤ ⁵⁷ከሰማዮች በላይ የተመሰገንህ ነህ፤ ⁵⁸የጌታ ፍጥረቶች ሁሉ እግዚአብሔርን ያመሰግኑታል፤ ⁵⁹ሰማዮች እግዚአብሔርን ያመሰግኑታል፤ ⁶⁰የጌታ መላእክት እግዚአብሔርን ያመሰግኑታል፤ ⁶¹ከሰማዮች በላይ ያሉ ውኃዎች ሁሉ እግዚአብሔርን ያመሰግኑታል፤ ⁶²የጌታ ኀይላት ሁሉ እግዚአብሔርን ያመሰግኑታል፤ ⁶³ፀሐይና ጨረቃ እግዚአብሔርን ያመሰግኑታል፤ ⁶⁴የሰማይ ከዋክብት እግዚአብሔርን ያመሰግኑታል፤ ⁶⁵ጠልና ዝናም እግዚአብሔርን ያመሰግኑታል፤ ⁶⁶ነፋሳት ሁሉ እግዚአብሔርን ያመሰግኑታል፤ ⁶⁷እሳትና ዋዕይ እግዚአብሔርን ያመሰግኑታል፤ ⁶⁸መዓልትና ሌሊት እግዚአብሔርን ያመሰግኑታል፤ ⁶⁹ጠልና ጤዛ እግዚአብሔርን ያመሰግኑታል፤ ⁷⁰ብርድና ውርጭ እግዚአብሔርን ያመሰግኑታል፤ ⁷¹ብርሃንና ጨለማ እግዚአብሔርን ያመሰግኑታል፤ ⁷²ደጋና ቈላ እግዚአብሔርን ያመሰግኑታል፤ ⁷³በረድና ጕም እግዚአብሔርን ያመሰግኑታል፤ ⁷⁴መብረቅና ደመና እግዚአብሔርን ያመሰግኑታል፤ ⁷⁵ምድር እግዚአብሔርን ታመሰግነዋለች፤ ⁷⁶ተራሮችና ኮረብቶች እግዚአብሔርን ያመሰግኑታል፤ ⁷⁷በምድር የሚበቅሉ ሁሉ እግዚአብሔርን ያመሰግኑታል፤ ⁷⁸ጥልቆች እግዚአብሔርን ያመሰግኑታል፤ ⁷⁹ባሕርና ፈሳሾች እግዚአብሔርን ያመሰግኑታል፤ ⁸⁰አንበሪና በውኃ ውስጥ የሚንቀሳቀስ ሁሉ እግዚአብሔርን ያመሰግኑታል፤ ⁸¹በሰማይ የሚበርሩ ወፎች ሁሉ እግዚአብሔርን ያመሰግኑታል፤ ⁸²አራዊትና እንስሳት ሁሉ እግዚአብሔርን ያመሰግኑታል፤ ⁸³የሰው ልጆች እግዚአብሔርን ያመሰግኑታል፤ ⁸⁴እስራኤል እግዚአብሔርን ያመሰግኑታል፤ ⁸⁵የጌታ ካህናት እግዚአብሔርን ያመሰግኑታል፤ ⁸⁶የጌታ ባሪያዎች እግዚአብሔርን ያመሰግኑታል፤ ⁸⁷መንፈስና የጻድቃን ነፍሳት እግዚአብሔርን ያመሰግኑታል፤ ⁸⁸አናንያና አዛርያ፥ ሚሳኤልም እግዚአብሔርን ያመሰግኑታል፤ ⁸⁹እግዚአብሔር ከሞትና ከሲኦል እጅ አድኖናልና፥ ከሚነድድም ከምድጃው እሳት አስጥሎናልና፥ ከነበልባሉም መካከል አውጥቶናልና፤ ለእግዚአብሔር ተገዙ፤ ስሙንም አመስግኑት፤ ቸር ነውና ምሕረቱም ለዘለዓለም ነውና። ⁹⁰የአማልክትን አምላክ እግዚአብሔርን የምትፈሩ ሁላችሁ እግዚአብሔርን አመስግኑት፤ ተገዙለት፤ አመስግኑትም፤ ቸርነቱ ለዘለዓለም ነውና። ⁹¹ንጉሡ ናቡከደነፆርም ሲያመሰግኑ ሰምቶ ተደነቀ፤ ፈጥኖም ተነሣ፤ አማካሪዎቹንም፥ “ሦስት ሰዎች አስረን በእሳት ውስጥ ጥለን አልነበረምን?” ብሎ ተናገራቸው። እነርሱም፥ “ንጉሥ ሆይ! እውነት ነው” አሉት። ⁹²ንጉሡም፥ “እኔ የተፈቱ በእሳቱም መካከል የሚመላለሱ አራት ሰዎችን በዚያ አያለሁ፤ ምንም የነካቸው የለም፤ የአራተኛውም መልክ የእግዚአብሔርን ልጅ ይመስላል” አለ። ⁹³የዚያን ጊዜም ናቡከደነፆር ወደሚነድደው ወደ እሳቱ እቶን በር ቀርቦ፥ “እናንተ የልዑል አምላክ ባሪያዎች፥ ሲድራቅና ሚሳቅ፥ አብደናጎም፥ ኑ ውጡ” ብሎ ተናገራቸው። ሲድራቅና ሚሳቅ፥ አብደናጎም ከእሳቱ መካከል ወጡ። ⁹⁴አለቆች፥ መሳፍንቱና ሹሞቹም፥ አዛዦቹና የንጉሡ ኃያላን ተሰብስበው እሳቱ ሰውነታቸውን እንዳልበላው፥ የራሳቸውም ጠጕር እንዳልተነካ፥ ሰናፊላቸውም እንዳልተለወጠ፥ የእሳቱም ሽታ በላያቸው እንዳልነበረ አዩ። ⁹⁵ንጉሡም በፊታቸው ለእግዚአብሔር ሰገደ፥ ናቡከደነፆርም መልሶ እንዲህ አለ፦ መልአኩን የላከ፥ ከአምላካቸውም በቀር ማንንም አምላክ እንዳያመልኩ፥ ለእርሱም እንዳይሰግዱ ሰውነታቸውን አሳልፈው የሰጡትን፥ የንጉሡንም ቃል የተላለፉትን፥ በእርሱ የታመኑትን ባሪያዎቹን ያዳነ፥ የሲድራቅና የሚሳቅ፥ የአብደናጎም አምላክ ይመስገን። ⁹⁶እኔም እንደዚህ የሚያድን ሌላ አምላክ የለምና በሲድራቅና በሚሳቅ፥ በአብደናጎም አምላክ ላይ የስድብን ነገር የሚናገር ወገንና ሕዝብ በልዩ ልዩ ቋንቋም የሚናገሩ ይቈረጣሉ፤ ቤታቸውም ይዘረፋል ብየ አዝዣለሁ አለ። ⁹⁷የዚያን ጊዜም ንጉሡ፥ ሲድራቅን ሚሳቅንና አብደናጎንም በባቢሎን አውራጃ ውስጥ ሾማቸው፤ ከፍ ከፍም አደረጋቸው፤ በግዛቱ ያሉ አይሁድንም ሁሉ አስገዛላቸው።