2 Chronicles Chapter 33 - መጽሐፈ ዜና መዋዕል ካልዕ | EOTC Bible

¹ምናሴም መንገሥ በጀመረ ጊዜ የዐሥራ ሁለት ዓመት ልጅ ነበረ፤ በኢየሩሳሌምም አምሳ አምስት ዓመት ነገሠ። ²እግዚአብሔርም ከእስራኤል ልጆች ፊት እንዳወጣቸው እንደ አሕዛብ ያለ ርኵሰት በእግዚአብሔር ፊት ክፉ ነገርን አደረገ። ³አባቱም ሕዝቅያስ ያፈረሳቸውን የኮረብታ መስገጃዎች መልሶ ሠራ፤ ለበዓሊምም መሠዊያ ሠራ፤ የማምለኪያ ዐፀዶችንም ተከለ፤ ለሰማይም ሠራዊት ሁሉ ሰገደ፤ አመለካቸውም። ⁴እግዚአብሔርም፥ “ስሜ በኢየሩሳሌም ለዘለዓለም ይኖራል” ባለው በእግዚአብሔር ቤት የጣዖት መሠዊያዎችን ሠራ። ⁵በእግዚአብሔርም ቤት በሁለቱ አደባባዮች ላይ ለሰማይ ሠራዊት ሁሉ መሠዊያዎችን ሠራ። ⁶በሄኖምም ልጅ ሸለቆ ውስጥ ልጆቹን በእሳት አቃጠለ፤ ሞራ ገላጭም ሆነ፤ አስማትም አደረገ። መተተኛም ነበረ፤ መናፍስት ጠሪዎችንና ጠንቋዮችንም ሰበሰበ፤ ያስቈጣውም ዘንድ በእግዚአብሔር ፊት እጅግ ክፉ ነገርን አደረገ። ⁷እግዚአብሔርም ለዳዊትና ለልጁ ለሰሎሞን፥ “በዚህ ቤትና ከእስራኤል ነገድ ሁሉ በመረጥኋት በኢየሩሳሌም ስሜን ለዘለዓለም አኖራለሁ፤ ⁸ያዘዝኋቸውንም ሁሉ፥ በሙሴ የተሰጠውን ሕግና ሥርዐት ፍርድንም ሁሉ ቢያደርጉ ቢጠብቁም፥ ለአባቶቻችሁ ከሰጠኋት ምድር የእስራኤልን እግር እንደ ገና አላርቅም” ባለበት በእግዚአብሔር ቤት ውስጥ የሠራውን ጣዖትና የተቀረጸውን ምስል አቆመ። ⁹ምናሴም እግዚአብሔር ከእስራኤል ልጆች ፊት ካጠፋቸው ከአሕዛብ ይልቅ ክፉ ይሠሩ ዘንድ በይሁዳና በኢየሩሳሌም የሚኖሩትን አሳተ። ¹⁰እግዚአብሔርም ምናሴንና ሕዝቡን ተናገራቸው፤ ግን አልሰሙትም። ¹¹ስለዚህም እግዚአብሔር የአሦርን ንጉሥ ሠራዊት አለቆች አመጣባቸው፤ ምናሴንም በዛንጅር ያዙት፤ በሰንሰለትም አስረው ወደ ባቢሎን ወሰዱት። ¹²በተጨነቀም ጊዜ አምላኩን እግዚአብሔርን ፈለገ፤ በአባቶቹም አምላክ ፊት ሰውነቱን እጅግ አዋረደ። ¹³የንጉሡ የሕዝቅያስ ልጅ ምናሴም ጸለየ እንዲህም አለ፦

¹⁴“ዓለምን ሁሉ የምትገዛ፥ ¹⁵በቃልህ ትእዛዝ ባሕርን የገሠጽሃት፥ ¹⁶ይኸውም በተመሰገነው ስምህ ነው፤ ¹⁷ለክብርህ ከፍተኛነት ፍጻሜ የለውምና፥ ¹⁸በትእዛዝህ ለሚሆነው ይቅርታ ስፍር ቍጥር የለውም፤ ¹⁹አሁንም አቤቱ፥ የጻድቃን አምላካቸው አንተ ነህ። ²⁰ቍጥሩ ከባሕር አሸዋ የሚበልጥ በደልን በድያለሁና፥ ²¹ከንቱውን ስመለከት የማይጠቅመኝንም ነገር ሳበዛ ²²አሁንም ቸርነትህን እየለመንሁ በልቤ ጕልበት እሰግዳለሁ። ²³አቤቱ፥ ጌታዬ፥ ፈጽሜ በደልሁ፤ ²⁴አንተንም እማልዳለሁ፤ እለምንህማለሁ፤ ²⁵ለዘለዓለም ክፋቴን አትመልከትብኝ፤ ²⁶በየጊዜውና በሕይወቴ ዘመን ሁሉ አመሰግንሃለሁ። ²⁷ከዚህ በኋላ በዳዊት ከተማ በስተውጭው ከግዮን ሰሜናዊ ምዕራብ በሸለቆው ውስጥ እስከ ዓሣ በር መግቢያ ድረስ ቅጥር ሠራ። እስከ ዖፌልም አዞረበት፤ እጅግም ከፍ አደረገው፤ በተመሸጉትም በይሁዳ ከተሞች ሁሉ የጭፍራ አለቆችን አኖረ። ²⁸እንግዶችንም አማልክትና ጣዖታቱንም ከእግዚአብሔር ቤት አራቀ፤ የእግዚአብሔርም ቤት ባለበት ተራራ ላይና በኢየሩሳሌም የሠራቸውን መሠዊያዎች ሁሉ ወስዶ ከከተማዪቱ በስተውጭ ጣላቸው። ²⁹የእግዚአብሔርንም መሠዊያ ደግሞ አደሰ፤ የደኅነትንና የምስጋናንም መሥዋዕት ሠዋበት፤ የይሁዳም ሕዝብ የእስራኤልን አምላክ እግዚአብሔርን እንዲያመልኩ አዘዘ። ³⁰ሕዝቡ ግን ከአምላካቸው ከእግዚአብሔር ፈጽመው ርቀው ገና በኮረብታዎች ላይ ይሠዉ ነበር፥ ³¹የምናሴም የቀሩት ነገሮች፥ ወደ አምላኩም የጸለየው ጸሎት፥ በእስራኤልም አምላክ በእግዚአብሔር ስም የነገሩት የነቢያት ቃል፥ እነሆ፥ በእስራኤል ነገሥታት መጽሐፍ ተጽፈዋል። ³²ደግሞም ጸሎቱን፥ እግዚአብሔር እንደ ሰማው፥ ኀጢአቱና መተላለፉ ሁሉ፥ ወደ እግዚአብሔር ሳይመለስ ኮረብታውን የሠራበት ዐፀዱንና የተቀረጹትንም ምስሎች የተከለበት ስፍራ፥ እነሆ፥ በባለ ራእዩ የታሪክ መጽሐፍ ተጽፈዋል። ³³ምናሴም ከአባቶቹ ጋር አንቀላፋ፤ በቤቱም አትክልት ቦታ ቀበሩት፤ ልጁም አሞጽ በእርሱ ፋንታ ነገሠ። ³⁴አሞጽ መንገሥ በጀመረ ጊዜ የሃያ ሁለት ዓመት ጐልማሳ ነበረ፤ በኢየሩሳሌምም ሁለት ዓመት ነገሠ። ³⁵አባቱም ምናሴ እንዳደረገ በእግዚአብሔር ፊት ክፉ አደረገ፤ አሞጽም አባቱ ምናሴ ለሠራቸው ለተቀረጹት ምስሎች ሁሉ ሠዋ፤ አመለካቸውም። ³⁶አባቱም ምናሴ ሰውነቱን እንዳዋረደ በእግዚአብሔር ፊት ሰውነቱን አላዋረደም፤ ነገር ግን አሞጽ መተላለፉን እጅግ አበዛ። ³⁷አገልጋዮቹም ተነሡበት፤ በቤቱም ገደሉት። ³⁸የሀገሩ ሕዝብ ግን በንጉሡ በአሞጽ ላይ የተነሡትን ሁሉ ገደሉ፤ የሀገሩም ሕዝብ ልጁን ኢዮስያስን በእርሱ ፋንታ አነገሡ።

መጽሐፈ ዜና መዋዕል ካልዕ 33

የይሁዳ ንጉሥ የምናሴ ዘመነ መንግሥት

የምናሴ ጸሎት